Breaking News
Join This Site
 ॥ భీష్మస్తుతీ ॥

॥ భీష్మస్తుతీ ॥





(శ్రీమద్భాగవతే మహాపురాణే పారమహంస్యాం సంహితాయాం ప్రథమ స్కన్ధే యుధిష్ఠిరరాజ్యప్రలమ్భః నామ నవమోఽధ్యాయః ॥)

శ్రీ భీష్మ ఉవాచ -
ఇతి మతిరుపకల్పితా వితృష్ణా భగవతి సాత్వత పుఙ్గవే విభూమ్ని ।
స్వసుఖముపగతే క్వచిద్విహర్తుం ప్రకృతిముపేయుషి యద్భవప్రవాహః ॥ ౩౨॥
త్రిభువనకమనం తమాలవర్ణం రవికరగౌరవరామ్బరం దధానే ।
వపురలకకులావృతాననాబ్జం విజయసఖే రతిరస్తు మేఽనవద్యా ॥ ౩౩॥
యుధి తురగరజోవిధూమ్రవిష్వక్కచలులితశ్రమవార్యలంకృతాస్యే ।
మమ నిశితశరైర్విభిద్యమానత్వచి విలసత్కవచేఽస్తు కృష్ణ ఆత్మా ॥ ౩౪॥
సపది సఖివచో నిశమ్య మధ్యే నిజపరయోర్బలయో రథం నివేశ్య ।
స్థితవతి పరసైనికాయురక్ష్ణా హృతవతి పార్థ సఖే రతిర్మమాస్తు ॥ ౩౫॥
వ్యవహిత పృథనాముఖం నిరీక్ష్య స్వజనవధాద్విముఖస్య దోషబుద్ధ్యా।
కుమతిమహరదాత్మవిద్యయా యశ్చరణరతిః పరమస్య తస్య మేఽస్తు ॥ ౩౬॥
స్వనిగమమపహాయ మత్ప్రతిజ్ఞా మృతమధికర్తుమవప్లుతో రథస్థః ।
ధృతరథచరణోఽభ్యయాచ్చలత్గుః హరిరివ హన్తుమిభం గతోత్తరీయః ॥ ౩౭॥
శితవిశిఖహతోవిశీర్ణదంశః క్షతజపరిప్లుత ఆతతాయినో మే ।
ప్రసభమభిససార మద్వధార్థం స భవతు మే భగవాన్ గతిర్ముకున్దః ॥ ౩౮॥
విజయరథకుటుమ్బ ఆత్తతోత్రే ధృతహయరశ్మిని తచ్ఛ్రియేక్షణీయే।
భగవతి రతిరస్తు మే ముమూర్షోః యమిహ నిరీక్ష్య హతాః గతాః సరూపమ్ ॥ ౩౯॥
లలిత గతి విలాస వల్గుహాస ప్రణయ నిరీక్షణ కల్పితోరుమానాః ।
కృతమనుకృతవత్య ఉన్మదాన్ధాః ప్రకృతిమగన్ కిల యస్య గోపవధ్వః ॥ ౪౦॥
మునిగణనృపవర్యసంకులేఽన్తః సదసి యుధిష్ఠిరరాజసూయ ఏషామ్ ।
అర్హణముపపేద ఈక్షణీయో మమ దృశి గోచర ఏష ఆవిరాత్మా ॥ ౪౧॥
తమిమమహమజం శరీరభాజాం హృదిహృది
ధిష్టితమాత్మకల్పితానామ్ ।
ప్రతిదృశమివ నైకధాఽర్కమేకం సమధిగతోఽస్మి విధూతభేదమోహః ॥ ౪౨॥
శ్రీ సూత ఉవాచ -
కృష్ణ ఏవం భగవతి మనోవాగ్దృష్టివృత్తిభిః ।
ఆత్మన్యాత్మానమావేశ్య సోఽన్తః శ్వాసముపారమత్ ॥ ౪౩॥


Post a Comment